|
Ўзбекистон Республикаси Монополияга қарши курашишқўмитасининг 2021 йил 11 майдаги 61-ИЧ-сон буйруғига илова
|
Истеъмолчилар ҳуқуқи устуворлигини таъминлаган тадбиркорлик субъектлари рейтингини юритиш
МЕТОДИКАСИ
I.Рейтингнинг мақсади
- Рейтингнинг асосий мақсади бўлиб хўжалик юритувчи субъектлар (иштирокчилар) томонидан истеъмолчилар ҳуқуқларини ҳимоя қилиш тўғрисидаги қонунчилик ҳужжатларига амал қилиш, истеъмолчиларнинг рейтинг иштирокчиси фаолиятини қўллаб-қувватлаш даражасини аниқлаш, шунингдек, Ўзбекистон Республикаси ҳудудида истеъмолчилар ҳуқуқи устуворлиги таъминлаганлик даражаси тўғрисида оммабоп маълумотларни шакллантириш ҳисобланади.
Рейтингнинг мақсади махфий ёки тижорат сири ҳисобланган, шунингдек фуқароларнинг шахсий маълумотларини йиғиш ҳисобланмайди.
- Рейтингни юритиш ва баҳолаш мезонларини белгилаш бўйича ваколатли орган – Ўзбекистон Республикаси Монополияга қарши қўмитаси ҳузуридаги Истеъмолчилар ҳуқуқларини ҳимоя қилиш агентлиги (кейинги ўринларда Aгентлик деб юритилади) ҳисобланади.
II.Рейтингни шакллантириш
- Рейтинг доимий равишда шакллантирилиб борилади ва Aгентликнинг расмий веб-сайтида оммабоп шаклда жойлаштирилади.
- Рейтинг – иштирокчига бериладиган балларнинг умумий сонига таъсир кўрсатадиган янги маълумотлар асосида чоракда бир марта янгиланади.
- Янги иштирокчиларни рейтингга киритиш янги аризаларнинг келиб тушиши ёки Aгентликнинг янги иштирокчиларни қўшиш ташаббусига қараб бир ойда кўпи билан 1 марта амалга оширилади.
- Овоз бериш 30 календарь кун ичида, бир чоракда камида 1 марта ўтказилади.
III. Рейтинг иштирокчиларини баҳолаш усуллари ва хусусиятлари
- Иштирокчиларни баҳолаш усулларига қуйидагилар киради:
иштирокчилар томонидан тақдим этиладиган маълумотларни визуал-қиёсий таҳлил қилиш ва баҳолашга асосланган ўрганишлар;
ахборот технологияларидан фойдаланган ҳолда овоз бериш.
- Белгиланган шартларга риоя қилиш даражасига қараб Агентлик томонидан Анкетанинг ҳар бир банди учун 1 дан 5 гача балл ажратилади.
- Aгентликка иштирокчининг истеъмолчилар ҳуқуқларини ҳимоя қилиш тўғрисидаги қонун ҳужжатларига риоя қилмаслиги тўғрисида тасдиқланган маълумот келиб тушадиган бўлса, ҳар бир ҳолат учун умумий баллар сонидан 1 балл айирилади. Тасдиқланган маълумотлар сифатида Aгентликка келиб тушган аризаларни кўриб чиқиш натижалари ёки Махсус комиссия томонидан истеъмолчилар ҳуқуқларини ҳимоя қилиш тўғрисидаги қонун ҳужжатларини бузилганлиги тўғрисида чиқарилган қарор ҳисобланиши мумкин. Ҳужжатли маълумотлар, фото, видео ёки аудио материаллар билан тасдиқланмаган анкетада кўрсатилган маълумотлар умумий балларни шакллантиришда ҳисобга олинмаслиги мумкин.
IV.Маълумотларни йиғиш усуллари
- Маълумотларни йиғиш усулларига қуйидагилар киради:
очиқ манбаларда жойлаштирилган Анкета шаклини иштирокчилар томонидан мустақил равишда тўлдириш ва уни ҳамда киритилган маълумотларни тасдиқловчи ахборотларни Aгентликка юбориш;
Агентликка жисмоний ва юридик шахсларнинг мурожаатлари (аризалари) кўринишида келиб тушадиган маълумотларни жамлаш;
солиқ тўловчилар томонидан савдо ва хизмат кўрсатиш қоидаларига риоя қилиниши бўйича, шу жумладан Давлат солиқ қўмитаси “Soliq hamkor” автоматлаштирилган ахборот тизими орқали назорат-касса машиналари ва тўлов терминалларидан фойдаланишда фуқаролардан келиб тушган маълумотларни жамлаш;
Aгентлик томонидан мониторинг ўтказиш давомида мустақил равишда очиқ манбалардан олинадиган (ижтимоий тармоқлар, оммавий ахборот воситалари) маълумотларни жамлаш.
- Рейтингни шакллантиришда ҳисобга олинадиган ҳар қандай маълумот фақат унинг тўғрилиги тасдиқлангандан сўнг қўлланилади.
V.Рейтингда иштирок этиш ва рейтингдан чиқариш шартлари
- Рейтингда фақат белгиланган тартибда рўйхатдан ўтган ва Ўзбекистон Республикаси ҳудудида фаолият юритувчи барча зарурий рухсатномаларга эга бўлган, юридик шахс ва якка тартибдаги тадбиркорлар сифатида давлат рўйхатидан ўтганига камида 12 ой бўлган юридик шахс ва якка тартибдаги тадбиркорлар иштирок этишлари мумкин.
- Ўзбекистон Республикаси ҳудудида бирон-бир тижорат фаолиятини амалга оширмайдиган хорижий компаниялар ваколатхоналари шаклидаги иштирокчилар рейтингда иштирок этишларига рухсат этилмайди.
- Рейтингда қатнашиш ихтиёрий бўлиб, Aгентликка тўғри тўлдирилган Анкетани юбориш билан тасдиқланади.
- Aгентлик жисмоний шахслардан келиб тушадиган мурожаатлар асосида иштирокчиларни мустақил равишда рейтингга қўшиш ҳуқуқига эга, шунингдек, савдо ва хизматлар кўрсатишнинг аниқ йўналишларини ўзларининг ўрганиш жараёнида. Aгентлик тегишли маълумотларни қонунчиликда белгиланган муддатларда олиш учун Иштирокчига Анкета нусхасини ёзма шаклда юборади.
- Иштирокчи тўғри тўлдирилган Aнкетани топширгандан сўнг, ўзини рейтингдан четлатилишини талаб қилишга ҳақли эмас.
- Рейтингдан чиқариш фақатгина тўпланган балларнинг умумий сони 0 (нол) дан кам бўлган тақдирда ёки Иштирокчи хўжалик юритувчи субъект сифатида тугатилган тақдирда амалга оширилиши мумкин.
- Иштирокчилар тақдим этган Анкеталар Aгентлик томонидан бир ҳафта ичида кўриб чиқилади ва натижалар тўғрисида Анкетада кўрсатилган алоқа воситлари орқали иштирокчи хабардор этилади.
- Филиалига ёки савдо тармоғига эга бўлган субъектлар ҳар бир алоҳида филиал учун Анкета юбориш ҳуқуқига эга эмас. Бундай Анкеталар такрорланувчи ҳисобланади ва кўриб чиқилмайди.
VI.Рейтинг натижалари
- Рейтинг Aгентликнинг расмий веб-сайтида эълон қилинади ва қуйидаги маълумотларни ўз ичига олади:
иштирокчининг юридик номи;
солиқ тўловчининг идентификация рақами;
савдо белгиси (товар белгиси, бренд);
юридик ва жойлашган манзили;
алоқа маълумотлари (веб-сайт, электрон почта, телефон ва бошқалар);
фаолият турлари бўйича иштирокчи тоифаси;
балларнинг умумий сони.
- Рейтинг натижалари устидан Иштирокчи қонун ҳужжатларида белгиланган тартибда Aгентликка расмий мурожаат қилиш орқали шикоят бериши мумкин.
- Рейтинг натижаларини бузиб кўрсатишга қаратилган қасддан қилинган ҳаракатлар – оммавий овоз беришда ёлғон овозларни қўшиш, Анкетада қасддан ёлғон маълумотлар бериш ёки бошқа шу каби ҳаракатлар амалга оширилган ҳолда, балларнинг умумий сонидан ушбу ҳаракатлар содир этилган бандлар бўйича баллар чиқариб ташланади.
VII. Якунловчи қоидалар
- Иштирокчи томонидан ўз ҳохишига кўра юборилган Aнкета орқали олинган маълумотлар, Aгентлик ёки бошқа давлат органлари томонидан белгиланган тартибда жавобгарликка тортиш чораларини кўришда фойдаланилиши мумкин эмас.
24. Aгентлик Иштирокчидан Aнкета шаклида кўрсатилган маълумотлардан ташқари қўшимча ҳужжат ёки маълумот талаб қилишга ҳақли эмас.