Savol: Bozordagi savdo shoxobchasidan mayonez sotib olgandim.Uyda salatga solishimdan oldin bir tatib ko‘rsam, ta’mi yoqimsiz, nordonlik sezildi.  Muddati o‘tib, eskirib qolganmikan deb yorlig‘iga qarasam yaroqlilik muddati o‘tmagan…
Aslida mayonezlarni tanlashda nimalarga e’tibor qaratish kerak?

SIFATSIZ BO‘LSA ALMASHTIRISH UCHUN MUDDAT BIR SUTKA

Javob: Mayonezlar yog‘-moy mahsuloti hisoblanib, undan taomlar, pishiriq va salatlar uchun foydalaniladi.
Bu mahsulot odatda 150, 200 va 250grammda shisha, plastmasa va maxsus qog‘ozli idishlarda qadoqlanadi.
Mayonezlarni oziq-ovqat do‘konlaridan xarid qilish maqsadga muvofiq bo‘ladi.
Tanlaganda uni saqlanish tartib-qoidalarga e’tibor qaratish lozim. Bu mahsulotlar quyosh nuri to‘g‘ridan-to‘g‘ri, tik tushadigan, yomg‘ir ta’sir qiladigan joylarda sotilishi ma’n etiladi. Bunday sharoitda sotilsa mayonezlarning tarkibi buzilishi aniq.
Mahsulotning bunday iste’molga yaroqsiz holatga kelishining yana bir omili bor. Ba’zi ishlab chiqaruvchilar tomonidan unga belgilangan
yaroqlilik muddatini uzaytirish maqsadida ortiqcha qo‘shimchalar solishadi. Bu esa o‘z o‘rnida inson sog‘ligiga ziyon yetkazishi mumkin. Shuning uchun iste’molchi mayonez sotib olayotganda tovarning nomi, qaysi davlatga tegishliligi, ishlab chiqaruvchi korxona, yog‘lilik darajasi va unga solingan konservantlar bilan tanishishi kerak. Asosiysi, mayonez yorlig‘ida ishlab chiqarilgan sana, saqlanish me’yori va yaroqlilik muddati ko‘rsatilgan bo‘lishi hamda shunga amal qilingan holda sotilishi shart.Sifatli mayonezning ta’mi yoqimli, qaymoq mazali, tuzi raso, shakar va kislotasi me’yorida bo‘ladi, ular tabiiy bo‘yoqlar, qo‘shimchalar va xantal bilan boyitiladi.
Iste’molga yaroqsiz mayonez mahsulotini amaldagi tartib-qoidalarga ko‘ra, nazorat kassa cheki bilan bir sutka davomida sifatlisiga almashtirish mumkin.